حافظ على صلاتك، أمورك كلها هتتظبط وحياتك هتستقر، ما شوفتش حد في حياتي ملتزم بصلاته في وقتها، بخشوعها وآدابها، إلا وربنا باركله في حياته، وفتحله أبواب الخير، وانشرح صدره، واتسهل رزقه. ربنا قال: “وَأمُر أهلك بالصلاة واصطبر عليها لا نسألك رزقًا نحن نرزقك والعاقبة للتقوى”. وفي نفس الوقت، ما شوفتش حد مستهتر بصلاته أو بيأخرها أو مش بيأديها زي ما ربنا أمر، إلا وحياته بتتلخبط، وقلبه بيتكدر، وبيحس إن الدنيا ضايعة ومفيش بركة. الصلاة هي مفتاح الراحة والاستقرار، وهي أكتر حاجة أكد عليها القرآن بعد التوحيد، زي ما ربنا قال: “واستعينوا بالصبر والصلاة وإنها لكبيرة إلا على الخاشعين”. وكان النبي: لما يضيق عليه الحال أو يحصل أي حاجة تقيلة، يقول لبلال: “أرحنا بالصلاة يا بلال”. صلاتك دي المفتاح لكل خير، ومن غيرها العمر بيعدي من غير طعم ولا بركة .